Пентагон Украинаға қолдау көрсетіп, $100 млн сомасындағы әскери көмектің жаңа траншын бөліп отыр, деп хабарлады Пентагонның ресми сайты. 2021 жылғы тамыздан бастап 51-ші көмек пакеті елдің қорғаныс мүмкіндіктерін нығайтуға бағытталған түрлі әскери жабдықтарды қамтиды.
Пентагонның хабарлауынша, әскери жабдықтар Украинаның егеменді аумағын қорғау және Ресейдің агрессивті әрекеттеріне қарсы тұру үшін беріліп отыр. Әскери көмек пакетіндегі элементтер:
Stinger зениттік зымырандары;
Жоғары жылдамдықты артиллериялық зымыран жүйесі (HIMARS) және оқ-дәрілер;
155 және 105 мм калибрлі артиллериялық снарядтар;
Оптикалық бақылаумен және сым арқылы басқарылатын (TOW) зымырандар;
Javelin және АТ-4 танкіге қарсы кешендері;
Атыс қаруына арналған 3 млн-нан астам патрон;
Кедергілерді тазалауға арналған қопарғыш оқ-дәрілер;
Суық ауа райына арналған жабдықтар;
Қосалқы бөлшектер, техникалық қызмет көрсету және басқа да қосалқы жабдық.
Пентагон өкілдері Украинаның қауіпсіздігін қамтамасыз етуге көмектесу АҚШ-тың ұлттық қауіпсіздігіне салынған инвестиция болып саналатынын, сондай-ақ аймақтағы ауқымды қақтығыстардың алдын алуға және басқа жерлердегі потенциалды агрессияны тежеуге ықпал ететінін атап өтті.
Бұл жаңалық Украина президенті Владимир Зеленскийдің 20 қарашада Пентагон басшысы Ллойд Остинмен кездесуінен кейінгі мәлімдемесінде расталды.