Құрама Штаттардың Тайваньға қару сату жөніндегі мәмілені мақұлдауы ресми Бейжіңнің негативті реакциясын тудырды. ҚХР СІМ аталған шешім АҚШ пен Қытай арасындағы қарым-қатынастың дамуына елеулі әсер етуі мүмкін деп мәлімдеді.
АҚШ Тайваньға шамамен $1,8 млрд сомаға қару сатуды мақұлдады, бұл Қытаймен арадағы шиеленістің артуына алып келуі мүмкін.
Хабарланғандай, келісім зымыран қондырғылары, анықтау датчиктері мен артиллерияны қоса алғанда, қару-жарақтың үш жүйесін сатуды көздейді. Олардың қатарына 135 жоғары дәлдікті қанатты зымыран, сондай-ақ мобильді жеңіл зымыран қондырғылары мен әуе барлау капсулалары кіреді.
Өткен аптада АҚШ-тың ұлттық қауіпсіздік жөніндегі кеңесшісі Роберт О’Брайен Қытайдың аралға басып кіру мүмкіндігі аз болғанына қарамастан, Тайвань «күшеюі» керек деп мәлімдеді. Тайвань қорғаныс министрлігі бұл қару «сенімді жауынгерлік әлеует құруға және асимметриялық соғыстың дамуын күшейтуге» көмектесетінін мәлімдеді.
Қытайдың сыртқы істер министрлігі қарумен жасалған мәміле АҚШ-пен қарым-қатынасқа елеулі әсер етуі мүмкін деп мәлімдеді.
«АҚШ-тан Тайваньға қару сату бір Қытайдың қағидатын елеулі түрде бұзады, бұл Қытайдың ішкі істерін, Қытай егемендігі мен қауіпсіздік мүдделерін елеулі түрде бұзу», — деп мәлімдеді ҚХР СІМ өкілі Чжао Лицзянь.
Соңғы айларда АҚШ Тайваньмен байланысын жандандырды. Трамп әкімшілігі кезінде АҚШ Тайваньға бұрынғыдан да көп қару сатқан.
21 тамызда Қытай АҚШ-тың Тайваньға қару-жарақ сатуды мақұлдауына наразылық білдірді. Бейжің бірнеше рет Тайванның әскери қуатын арттыруға қарсы болып, аралмен қорғаныс саласындағы ынтымақтастыққа байланысты Штаттарға наразылық білдірді.
Айта кету керек, барлық дерлік елдер, соның ішінде Қазақстан да Тайвань Қытайдың бір бөлігі екенін мойындайды.