Жұмыс іздеп жүрген адамдар саны өсті. Хабарламада айтылғандай, электронды еңбек биржасында биылғы жылдың қыркүйек айында орналастырылған түйіндемелер саны өткен жылмен салыстырғанда 8%-ға көп.
Аталған деректерді Еңбек және халықты әлеуметтік қорғау министрлігінің баспасөз қызметі ұсынды.
«Еңбек ресурстарын дамыту орталығы» АҚ (ЕРДО) деректері бойынша Электрондық еңбек биржасында қыркүйек айында кәсіпорындар тарапынан кадрларға, сондай-ақ жұмыс іздеп жүрген адамдарға сұраныстың өсімі байқалды: 137,9 мың бос жұмыс орны (+22%) және 62,2 мың түйіндеме (+8%) орналастырылды. Оқу жылының басталуына байланысты бос орындардың ең көп санын білім беру саласындағы ұйымдар орналастырды», — делінген дүйсенбіде таратылған хабарламада.
Электронды еңбек биржасында жұмыс іздеушілер бос жұмыс орындарын өздігімен іздестіре алады
«Осылайша, ағымдағы жылдың 1 қыркүйегінен бастап жұмыс іздеушілер «Ұрпақтар келісімшарты» және «Алғашқы жұмыс орны» жобалары бойынша мемлекет субсидиялайтын жұмыс орындарында бос орындарды өз бетінше таңдауға мүмкіндік алды. Бұл, өз кезегінде, ЭЕБ арқылы көрсетілетін мемлекеттік қызметтердің тізбесін кеңейтті, онда азаматтар жастар практикасы, қоғамдық жұмыстар және әлеуметтік жұмыс орындары сияқты қолдау шараларына қатысады, сондай-ақ жұмыс іздеп жүрген адам ретінде немесе жұмыссыз ретінде есепке тұра алады, жұмысынан айырылған жағдайда әлеуметтік төлемдер алуға өтінім бере алады», — делінген хабарламада.
Түйіндемелер саны ғана емес, бос орындар саны да артты: неге?
Осы айда сұраныс серпініне әсер еткен тағы бір фактор Қазақстан халқының жалпыұлттық санағы болды.
Фото: Қазақстанда электронды еңбек биржасында жұмыс іздеп жүрген адамдар саны 8%-ға өсті
«Мәселен, ЭЕБ-да 7,8 мың интервьюер бос орны жарияланды, тамыз айымен салыстырғанда өсім 5,3 мыңды құрады, өңірлер бөлінісінде интервьюерлер үшін бос орындардың ең көп саны Түркістан, Шығыс Қазақстан, Алматы және Жамбыл облыстарында орналастырылды», — деп нақтылады ведомстводағылар.
«Екінші жағынан, бос жұмыс орындары сияқты, жұмыс іздеушілер белсенділігінің ең көп төмендеуі Алматы қаласында (-24%) және Маңғыстау облысында (-21%) байқалады. Сонымен қатар түйіндеменің ең көп өсімі Ақмола (+40%) және Солтүстік Қазақстан (+39%) облыстарында болды, оларда басқа өңірлермен салыстырғанда жалпы түйіндемелердің ең аз саны байқалады – тиісінше 1,6 мың және 2 мың», — делінген хабарламада.