Қазақстан Президенті Қасым-Жомарт Тоқаев белгілі қазақстандық музыкатанушы Юрий Аравинді марапаттау туралы жарлыққа қол қойды. Жарлықтың мәтіні Ақорданың сайтында жарияланған.
Ұлттық мәдениетті және музыка өнерін насихаттау мен дамытуға қосқан ерекше еңбегі үшін музыкатанушы Юрий Петрович Аравин «Отан» орденімен наградталсын, — делінген ресми хабарламада.
Осы Жарлық қол қойылған күнінен бастап қолданысқа енгізіледі.
Юрий Петрович Аравин — қазақстандық музыкатанушы, музыкалық педагог, профессор. Қазақстанның еңбек сіңірген қайраткері (1995).
Ол «Музей звуков», «Малая антология казахской музыки» теледидар бағдарламасының, «Тотем» радиосындағы «Степное созвездие» авторлық циклінің авторы.
Юрий Аравин “Лирическая поэма памяти Абая”, “К вопросу о тематизме симфонических поэм Казахстана”, “Три поэмы о народных героях”, «Поэма Тулебаева “Казахстан”, “У истоков современного уйгурского симфонизма”, “К истории песенного симфонизма”, “Степные созвездия” сияқты шығармалардың авторы. «Мелодия» фирмасының граммофон жазбаларына, Қазақстан композиторлар одағының буклеттеріне, опера және балет либреттоларына аннотация, эссе мен қазақ музыкасы туралы зерттеулер жазған. Музыка тарихы бойынша оқулықтар жасауға қатысты. Қазақстан композиторлар одағы мен музыка қайраткерлері одағының мүшесі.